15/08/2024, Biter Lau-Fatuahi, Cristo Rei, Dili Timor-Leste – Ekipa Tékniku Regulador Autoridade Nacional de Comunicações (ANC) Kompostu husi Eng. Fabio de Magalhães, Eng. Octavio Marques Freitas no Eng. Jacinto Fernandes reprezenta Presidente ANC partisipa iha serimonia entrega no lansamentu Sistema Radiu Komunikasaun Digital iha Tore Biter Lau-Fatuahi.
Haree ba inovasaun teknolojia presija halo mudansa hodi adapta tuir dezenvolvimentu ne’ebé iha liu husi sistema radiu komunikasaun digital hanesan passu ida hodi moderniza komunikasaun iha instituisaun Polisia Nasional Timor-Leste (PNTL). PNTL hetan ona apoiu husi Timor-Leste Police Development Program (TLPDP) hodi hari’i sistema radiu komunikasaun digital ba faze I ne'ebe atinji ona 50% iha Munisipiu balun husi Teritoriu Timor laran.
Eng Fabio de Magalhães iha ninian deskursu badak lori naran Ministro dos Transportes e Comunicações no Presidente ANC introdus ANC hanesan orgaun regulador independente ida ne’ebé estabelese bazea ba dekretu lei Nú.15/2012, ho nia funsaun atu regula setor telekomunikasaun, radio komunikasaun, radiodifuzaun nomos internet. Radio Komunikasaun parte ida husi Spectrum Radio Frekuénsia hanesan rekursu nasional ba nasaun Timor-Leste nian ne'ebe tenke regula ho diak para bele fo benefisiu no efisien ba ekonomia nasaun ninian. Haree husi tranformasaun husi analog ba digital ne’e fo vantajen diak ba ita hotu tamba ne’e hanesan reprezentante ANC hato’o parabéns ba Australian Federal Police liu husi programa TLPDP ne’ebé apoiu ona ekipamentus radio komunikasaun digital ba PNTL.
Partisipa iha serimonia ne’e mai husi Ministro Interior Francisco da Costa, Komandante Jeral PNTL Komisariu Henrique da Costa, Segundu Komandante Jeral PNTL Komisariu Polisia Pedro Belo nomos komandante Munisipu Sira.