Díli, 18 Fevereiru 2025 – Administradora Finanças Autoridade Nasional Komunikasaun (ANC.IP) Sra. Georgina Emília da Silva Garcia ho ekipa simu vizita kortezia husi delegasaun Japan Malaysia Technical Institute (JMTI) no Ajénsia Kooperasaun Internasionál Japaun (JICA), iha Salaun Enkontru ANC, Kaikoli.
Vizita kortezia husi JMTI no JICA Malaysia mai ANC hodi introdus kona ba Third Country Training Program (TCTP), ne'ebé kada tinan realiza kapasitasaun ba rekursu umanu ne'ebe partisipa husi nasaun subdezenvolvidu sira inklui Timor-Leste. Iha tinan 2025 JMTI sei realiza program formasaun kona-ba "CYBER SECURITY IN DIGITAL ECONOMY".
Ho vizita ida ne’e ANC nudar benefisiariu ba Third Country Training Program (TCTP), nune'e JMTI ho JICA halo mós diskusaun hodi rekolla opiniaun relasiona ho formasaun sibernetika atu nune'e saida mak sira oferese iha futuru bele koresponde ho ANC ninia proposta no mos atu komprende di'ak liután implementasaun atuál no estratéjia sira liliu kona ba kapasitasaun ba rekursu umanu foka ba seguransa sibernetika.
Enkuantu vizita ne’e mós sei sai hanesan komponente xave ida ba faze preparatóriu Third Country Training Program (TCTP) nian ne'ebé sei realiza durante tinan tolu hahu husi 2025 to'o 2028.