22 Janeru 2024, MTC- Bazea ba despacho husi Gabinete Primeiro Ministro Nú.010/GPM/I/2024, nomeasaun presidente interinu ANC ne’ebé públika iha Jornal Republika nomea Sr. Eng. Flávio Cardoso Neves hodi substitui Sr. João Oívio Freitas ne’ebé termina ona mandatu.
Kargu Xefia ANC hamutuk ho funsionáriu simu Presidente Interinu Autoridade Nasional de Comunicações (ANC) Sr. Eng. Flávio Cardoso Neves, hafoin simu Presidente Interinu ANC hala’o kedas enkontru ho kargu xefia ANC, funsionáriu no asesor iha Salaun enkontru ANC.
Durante enkontru Presidente sesante ANC Sr. João Olívio Freitas hateten hanesan Eis Presidente ANC nomos membru konsellu administrasaun fó bemvindo ba presidente interinu ANC aumesmu tempu hato’o mós ami nia disponibilidade atu kopera ho Presidente Interinu ANC hodi asegura funsionamentu ANC iha inisiu fulan ida ne’e bele lao ho diak hodi bele asegura mós presidente interinu nia funsaun. Iha buat balun ne’ebé ami halo ona no buat balun ne’ebé seidauk halo ami prontu nafatin atu kontribui.
Presidente sesante husu mós ba funsionáriu hotu atu kopera diak ho Presidente Interinu ANC hodi lori ANC sai boot liu tan ba oin. Nune’e mos sei prepara relatoriu ida atu entrega ba Presidente Interinu ANC. Tanba ne’e ANC tenke transparansia atu la iha ida mk rai iha kotuk atu labele prejudika fali presidente foun nia servisu entaun funsionáriu hotu tenke sai ema ne’ebé transparansia, profesional, kontributivu, suportivu, koperativu hodi asegura nafatin presidente interinu nia funsionamentu sai diak no susesu ba oin, labele lori personalidade mai tau iha servisu profesionalismu tanba bele prejudika servisu instituisaun nian.
Enkuantu Presidente Interinu ANC Sr. Eng. Flávio Cardoso Neves hateten ha’u apresia ohin dader imi bele simu hau ho diak atu bele tama iha fatin ida ne’e. Primeru imi nia servisu durante ne’e ha’u apresia tantu presidente sesante ho nia ekipa tomak tanba imi nia kontribuisaun ANC lao ho diak ne’e fakta ne’ebé mak iha tanba ha’u mai atu haforte deit ekipa ANC atu suporta malu tanba ita mai hosi fatin hotu-hotu ita mai ho objetivu ida deit atu dudu ANC ne’e lao ba oin. Orgaun ANC ne’e orgaun regulador atu regula operador sira ne’ebé hala’o nia knár iha setor telekomunikasaun. Atu garantia ANC ba oin presija ekipa ne’ebé forte no unidade atu dezenvolve setor telekomunikasaun no presija nafatin presidente sesante nia kontribuisaun atu haree hamutuk servisu barak ne’ebe ita sei halo.
Presidente Interinu ANC akresenta hanesan Presidente Interinu ANC hau mai iha ne’e atu oituan ka barak sei kontribui no servisu hamutuk tanba ANC ema hotu nian ba interese ida ne’ebé boot liu mak interese nasional.