Presidente Autoridade Nacional de Comunicações (ANC) Sr. Flávio Cardoso Neves hamutuk ho Administradora Finansas Sra. Georgina Emilia da Silva Garcia simu ekipa delegasaun husi 𝘔𝘢𝘭𝘢𝘺𝘴𝘪𝘢𝘯 𝘊𝘰𝘮𝘮𝘶𝘯𝘪𝘤𝘢𝘵𝘪𝘰𝘯𝘴 𝘢𝘯𝘥 𝘔𝘶𝘭𝘵𝘪𝘮𝘦𝘥𝘪𝘢 𝘊𝘰𝘮𝘮𝘪𝘴𝘴𝘪𝘰𝘯 (𝘔𝘊𝘔𝘊), iha Salaun Enkontru ANC, Caicoli.
Objetivu husi reuniaun dahuluk entre ANC.IP ho ekipa delegasaun Malaysian Communications and Multimedia Commission (MCMC) hanesan marka pasu signifikativu ida atu hametin kooperasaun institusionál ne’ebé relasiona ho atividade entidade rua nian nudar orgaun reguladór nasional iha setor komunikasaun.
Prezidente ANC Flávio Cardoso Neves hateten Timor-Leste kontinua nia viajen ba transformasaun dijitál no integrasaun iha komunidade ASEAN, Kolaborasaun ida ne’e nu’udar prioridade xave ida bainhira Timor-Leste prepara ba nia adezaun formál istóriku nu’udar membru ASEAN ba dala 11 iha loron 26 Outubru 2025.
“Ami haree kolaborasaun ho MCMC hanesan estratéjiku no oportunu. Malázia nia esperiénsia no lideransa iha inovasaun regulatória, jestaun espektru, inkluzaun dijitál, no kooperasaun rejionál oferese hanoin sira ne'ebé iha valór ba ami nu'udar autoridade joven ida”. iha Salaun ANC.
Durante diskusaun parte rua troka perspetiva kona-ba papél institusionál no enkuadramentu regulatóriu sira, no esplora área sira ho interese mútua, partikularmente kona-ba viabilizasaun servisu sira roaming nian, dezenvolve pakote rejionál espesiál iha ambitu ASEAN no formaliza kooperasaun liuhosi Memorandu Entendimentu entre (MoU) MCMC no ANC.IP.
“Ita nia komprensaun atuál mak MoU institusionál ida ne’e sei asinatura husi Governu Timor-Leste ho Governu Malázia. Ami sei kontinua koordena besik ho ekipa kona-ba tempu apropriadu ba MoU entre ANC.IP ho MCMC, tuir progresu no orientasaun sira no fiar katak liu hosi parseria ida-ne'e, ita bele aprende hosi ida-idak, hasa'e kooperasaun transfronteirisu, no ikus mai kontribui ba Sudeste Aziátiku ida ne'ebé konetadu no Dijital liu”. Prezidente ANC konklui.
Entertantu Partisipa iha reunian ne’e, Xefe Gabinete Polítika Planeamentu no Kooperasaun MTK, Sr. Fernando da Cruz, Koordenador Protesaun Konsumidor ANC Sr. Názario Jeronimo, Xefe Seksaun Lisensamentu ANC Sr. Norberto Soares inklui Asesor sira.