Díli, 10 Fevereiru 2025, Autoridade Nacional de Comunicação (ANC.IP) ho Ajénsia Kooperasaun Internasional Japaun (JICA) realiza seminariu ho tema "Hasa'e Konsiénsia kona-ba Seguransa Sibérnetika, Paizajen, no Papél Enjeñeiru Tékniku Informatika (IT)", iha Salaun, Pusat Budaya Indonesia, Díli.
Administrador Tékniku ANC Sr. Novelino dos Santos hateten seminariu ida ne’e atu hasa’e koñesimentu kona-ba seguransa sibernétika iha transformasaun dijitál ne’ebé evolui iha Timor-Leste no ita tenke garante katak ita preparadu atu enfrenta dezafiu sira ho kapasidade Tekniku ne'ebé bele kombate atake sira no Melhora Ekipa tékniku profisionál IT sira nia hanoin klean kona-ba ameasa sibernétika globál no sira nia papél krítiku hodi asegura seguransa dadus no sistema nian bá defende interese estadu.
Semináriu ne’e mós hanesan parte ida hosi ANC nia esforsu sira haktuir ba polítika Governasaun da sia (9) nian, atu harii baze ida ne'ebé metin hodi hasoru dezafiu sira hosi mundu dijitál, liuliu ho mudansa globalizasaun ne'ebé aumenta ba protesaun dadus no sistema teknolójiku sira iha setór oioin, inklui governu, no sosiedade tomak.
Liuhusi semináriu ida-ne'e, Eleva konesimentu partisipante sira kona-ba importánsia seguransa sibernétika nian, liuliu iha protesaun sistema sira hosi ameasa esterna sira no mós enkoraja profisionál IT Timor oan sira atu kontinua hasa’e sira-nia kompeténsia, atu nune’e sira bele fó kontribuisaun loloos ba dezenvolvimentu teknolójiku nasionál hodi harii konsiénsia kona-ba importánsia étika nian iha utilizasaun teknolojiá ho responsabilidade.
Siberseguransa la'ós de'it kestaun téknika, maibé mós kona-ba sustentabilidade ekonómika no estabilidade nasionál. Semináriu ne'e hanesan pasu ida tan hodi prepara Timor-Leste sai nasaun ida ne'ebé maka bele jere di'ak liu dezafiu sira hosi era dijitál, mantein nafatin étika no responsabilidade sosiál.
Entertantu Atividade ne'e organiza hosi Autoridade Nacional de Comunicações (ANC.IP) iha kolaborasaun ho Ajénsia Kooperasaun Internasionál Japaun nian (JICA). Apoiu hosi JICA hatudu importánsia hosi kolaborasaun internasionál hodi harii kapasidade teknolójiku iha Timor-Leste. Liuhosi kolaborasaun ne'e, bele fornese formasaun ne'ebé relevante no fó impaktu pozitivu ba partisipante sira hodi kontribui ba mudansa signifikativu iha nível nasional nian.
Partisipa iha seminariu ne’e mai husi Intituisaun Governu, Operador Telekomunikasaun Telemor, Timor Telecom, Telkomsel, Reprezenta husi empreza Internet service Provider (ISP) no Universidade.