Manatuto, 12 Agostu 2025 - Autoridade Nacional de Comunicações (ANC.IP) hamutuk ho Diresaun Nasional Infraestrutura no Komunikasaun (DNIK) sosializa Papel ANC no Asuntu Infraestrutura iha Setor Telekomunikasaun, iha salaun Parokia Manatuto.
Autoridade Nacional de Comunicações (ANC.IP) hanesan institutu públiku ida ne’ebé mak ho personalidade jurídiku, investidu ho autonomia finanseira no administrativa, orsamentu no patrimóniu própriu, estabelese husi Dekretu-Lei nú. 15/2012, 28 Marsu kona ba regulasaun setor telekomunikasaun, ho misaun atu ezerse funsaun sira hanesan entidade reguladora setor telekomunikasaun nian, iha atribuisaun, obrigasaun no poder atu regula setor telekomunikasaun iha Timor-Leste liu-liu iha telekomunikasaun, radiukomunikasaun, radiudifuzaun (parte balun) no Internet, no iha biban hanesan, asumi direitu no obrigasaun hodi asegura reprezentasaun Governu Timor-Leste iha organismu no eventu sira nasional, regional no internasional iha setor telekomunikasaun nian.
Objetivu husi sosializasaun ne’e atu partilla informasaun kona ba papel ANC oinsa regula no superviziona servisu operador no asuntu infraestrutura telekomunikasaun iha Timor-Leste, hakbesik programa IX Governu Konstituisional ne’ebé iha relasaun ho servisu Ministériu Transporte no Komunikasaun, promove partisipasaun públiku iha prosesu dezenvolvimentu infrastrutura iha setor telekomunikasaun no hasa’e koñesimentu konsumidores telekomunikasaun liu husi literasi digital nomos fahe informasaun relevante kona ba diretu no obrigasaun konsumidor nian.
Entertantu programa sosializasaun ne’e loke no taka husi Xefi Gabinete Ministériu Transporte no Komunikasaun Sr. José da Costa.
Enkuantu programa ne’e partisipa husi Diretor Jerál Administrasaun no Finansas Sr. Aniceto Leto Soro, Diretor Ezekutivu TIC Timor Sr. Venâncio Pinto, Reprezentante Prezidente Autoridade Munisipiu Manatuto, Administrador Postu, Xefi Suku, Estudante, Joventude, PNTL,Reprezentante operador telekomunikasaun Timor Telecom, Telkomcel, Telemor nomos konvidadus seluk.