Bobonaro, 9 Setembru 2025 - Autoridade Nacional de Comunicações (ANC.IP) hamutuk ho Diresaun Nasional Infraestrutura no Komunikasaun (DNIK) sosializa Papel ANC no Asuntu Infraestrutura iha Setor Telekomunikasaun, iha Salaun Maria Tapo Munisipiu Bobonaro.
Objetivu prinsipál husi programa sosializasaun ne’e mak atu partilla informasaun kona-ba papel ANC oinsa regula no superviziona servisu operador no asuntu infraestrutura telekomunikasaun iha Timor-Leste, hakbesik programa IX Governu Konstituisional ne’ebé iha relasaun ho servisu Ministériu Transporte no Komunikasaun, promove partisipasaun públiku iha prosesu dezenvolvimentu infraestrutura iha setor telekomunikasaun no hasa’e koñesimentu konsumidores telekomunikasaun liu husi literasi dijitál nomos fahe informasaun relevante kona-ba direitu no obrigasaun konsumidor nian.
Governu nia papél ida mak atu bele kria governu dijitál ida ne’ebe ligadu, inovativu nomos inkluzivu iha setor telekomunikasaun ne’ebé sempre iha evolusaun ida lais tebes, ANC nia papél nudar regulador la’os deit atu garantia transparénsia iha merkadu telekomunikasaun nian, maibé sai mós hanesan fasilitador ida ba kresimentu hodi haburas inovasaun, proteje direitu konsumidór sira nian no garantia katak la ih ema ida hela iha kotuk iha evolusaun dijitál.
Presidente Interina ANC Sra. Georgina Emilia da Silva Garcia hateten onra mai ANC atu bele hamrik iha fatin ida ne’e bele fó bemvindu ba ita boot sira hotu iha ami nia sosializasaun ida ne’ebé importante tebtebes hodi bele reafirma ami nia kompremisu hodi bele kria redi telekomunikasaun ida ne’ebé modernu liga Timor oan sira hotu ba malu nomos ba mundu. Entaun loron ohin mak sai nudár oportunidade ida mai ami ANC ho DNIC atu bele fahe informasaun importante kona-ba papél no responsabilidade sira husi ANC nudár regulador telekomunikasaun no haree mós kona-ba impaktu kualidade no asesibilidade iha servisu telekomunikasaun nian.
Entertantu programa sosializasaun ne’e loke no taka husi Diretor DNIC Sr. Ambrosio de Amaral no akompaña husi Prezidente Autoridade Munísipiu Bobonaro Sr. Paulo Moniz Maia ho Presidente Interina ANC Sra. Georgina Emilia da Silva Garcia.
Relembra katak, antes ne’e ANC halo ona programa sosializasaun iha Munisipiu Manufahi, Ainaro, Lospalos, Baucau, Viqueque, Ermera no Manatuto.
Enkuantu programa ne’e partisipa husi Prezidente Autoridade Munisipiu Bobonaro Sr. Paulo Moniz Maia, Administrador Postu, Joventude, sosiedade sivil, PNTL, Estudante Ensinu Sekundaria sira, Funsionáriu Administrasaun Munísipiu Bobonaro, reprezentante funsionáriu MTC inklui reprezentante operador telekomunikasaun Timor Telecom, Telkomcel no Telemor.