Autoridade Nacional de Comunicações Timor Leste (ANC.IP) iha kolabarosaun ho ANACOM Portugal realiza seminariu internasional ho tema “Promovendo uma Infraestrutura Digital Robusta e uma Tecnologia Avançada para um Desenvolvimento Sustentável" iha Salaun Novo Turismo, Bidau Lecidere.
Objetivu hosi seminariu ne’e atu hasa'e konxiénsia parte interesada sira nian kona-ba importánsia hosi sistema kabu submarinu, sentru dadus sira, konetividade ekonomia azul, siberseguransa no teknolojia Artificial intelligence (AI) nian iha dezenvolvimentu sosio-ekonómiku nasionál. Promove fahe koñesimentu no kolaborasaun entre setór sira: fornese plataforma ida ba akademia, autoridade reguladora, instituisaun públika, no operadór telekomunikasaun sira hodi troka esperiénsia, peskiza, no prátika di'ak liu iha planeamentu, implementasaun, no protesaun ba infraestrutura dijitál krítiku sira. Diskute estratéjia infraestrutura no enkuadramentu polítika: fasilita diálogu kona-ba estratéjia nasionál, polítika no enkuadramentu regulatóriu ne'ebé presiza atu apoia dezenvolvimentu reziliente, seguru no sustentável hosi kabu submarinu no sentru dadus sira, inklui apoiu ba ekonomia azul.
Esplora oportunidade sira iha AI no konetividade iha futuru: aprezenta tendénsia globál sira iha Intelijénsia Artifisiál no konetividade iha futuru, ho foku partikulár ida iha kuadru regulatóriu UE nian kona-ba AI, no diskute ninia implikasaun sira ba polítika nasionál, inovasaun no konformidade.. Apoia peskiza, inovasaun no kapasitasaun: enkoraja kolaborasaun peskiza no dezenvolvimentu kapasidade téknika no institusionál iha área sira hanesan governasaun dadus, prátika ekonomia azul sustentável no teknolojia dijitál emerjente sira.
Prezidente ANC Flávio Cardoso Neves hateten eventu ida ne’e hola parte iha kolaborasaun estratejika hodi fahe koñesementu entre orgaun regulador sira iha setor telekomunikasaun liliu dezenvolvimentu ba teknolojia foun.
“Kolaborasaun ne'e fornese plataforma ida hodi fahe koñesimentu, liuliu kona-ba teknolojia sira hanesan AI, kabu submarinu no infraestrutura dijitál ne'ebé dezenvolve lalais. Ami garanti katak ema hotu iha asesu no oportunidade hanesan iha setór teknolójiku. Importánsia hosi kolaborasaun entre setór sira hodi aselera dezenvolvimentu ekosistema dijitál iha Timor-Leste mak Plataforma kolaborativu sira tenki implementa la'ós hanesan kompetisaun, maibé hanesan meiu ida hodi hametin kapasidade nasional liu hosi tipu koperasaun ida ne'e ita bele aselera dezenvolvimentu teknolójiku tuir nesesidade nasaun nian".
Entertantu seminariu internasional ne’e abertura hosi S.E. Ministru Transporte no Komunikasaun Eng. Miguel Marques Gonçalves Manetelu no iha parte lokraik ensera hosi Administradora Financas ANC.IP Sra. Georgina Emilia da Silva Garcia.
Enkuantu eventu ne’e hetan partisipasaun hosi Intituisaun Governu sira, Operador Telekomunikasaun Telemor, Timor Telecom, Telkomsel, Câmara de Comércio e Indústria de Timor-Leste (CCI-TL), ISP, sosiedade sivil, Akademika inklui parseiru dezenvolvimentu sira.