Autoridade Nacional de Comunicações (ANACOM) Portugal iha kooperasaun ho Autoridade Nacional de Comunicações (ANC.IP) Timor-Leste, realiza formasaun tékniku kona-ba Jestaun dadus internu ne’ebé foka liu ba iha área espesializada sira ba funsionáriu tékniku, finansas, ekonomista no protesaun konsumidores, iha Salaun Correios, Kintal Ki’ik.
Formasaun ne’e sei foka liu ba área espesializada sira ho objetivu atu hasa'e koñesementu no abilidade funsionáriu sira nian hodi atualiza nafatin dezenvolvimentu indústria no teknolojia emerjente sira, hasa'e produtividade no efisiénsia serbisu, apoia avansu no sertifikasaun iha kareira, no asegura kumprimentu ho regulamentu indústria nian ne'ebé rigorozu. Formasaun ne’e mós atu kapasita ema ida-idak, dudu kreximentu organizasionál, no ajuda sira atu adota teknolojia dijitál no prepara ema ida-idak atu hasoru dezafiu iha era globalizasaun no dezenvolvimentu teknolojia.
Atividade ne’e sei realiza durante loron haat (4) hahu hosi loron tersa-feira, 7-10 Outubru 2025, ne’ebé aprezenta hosi ANACOM Prof. Manuel Cabugueira, vogal do CA, Augusto Fragoso, Diretor-Geral Informação e Inovação e Luis Roque Pedro, Diretor Delegação Porto.
Relembra fali katak, Protokolu kooperasaun ne’ebé asina entre ANACOM no Autoridade Nasionál Komunikasaun (ANC.IP) Timor-Leste, iha loron 21 fulan-abril tinan 2022, ne’ebé estabelese mekanizmu ida ba kooperasaun téknika no institusionál iha matéria sira ne’ebé relasiona ho atividade entidade rua nian, nu’udar órgaun regulador nasionál ba setór komunikasaun ho objetivu atu kontribui ba dezenvolvimentu iha ida-idak nia nasaun.
Entertantu formasaun ne’e partisipa mós hosi Administradora Finansas ANC Sra. Georgina Emilia da Silva Garcia ho Xefi Seksaun sira.