Díli, 06/02/2025, Administrador Tékniku Konsellu Administrasaun Autoridade Nasionál Komunikasaun ANC-IP, Sr. Novelino Dos Santos, hala’o enkontru ho funsionáriu tékniku husi Unidade Lisensiamentu atu atualiza progressu servisu sira.
Unidade lisensiamentu nu'udar parte importante ne'ebé konjuga direita bá Seksaun Regulasaun hodi hala'o papel bá regularija no superviziona servisu sira ligadu ho jestaun, alokasaun no atribuisaun rekursu telekomunikasaun hanesan espektru rádiu-frekuênsia bá servisu telekomunikasaun sira hanesan tuir mai:
a. Internet Service Provider (ISP)
b. Servisu Radiudifuzaun (rádiu AM/FM no televizaun)
c. Rádiu móvel terrestre (land mobile radio)
d. Servisus fixu [terrestre] ([Terrestrial] fixed services)
e. Móvel aeronáutica (aeronautical mobile)
f. Maritime Mobile Services Identity (MMSI)
g. Ship Station
h. Earth Station
i. VSAT (Very Small Aperture Terminal)
j. Amateur Radio Service
Objetivu husi enkontru refere mak atu estabelese ekipa integradu ida ne’ebé independente no livre husi konflitu interese, hodi konsolida dokumentus sira ligadu ho prosesu lisensiamentu bá operadores ezistente sira ne’ebé mak ninia lisensa emitidu expira ona, prosesamentu pedidu renovasaun lisensa, no prosesamentu aplikasaun/submisaun foun bá rejistrasaun nian.
Aleinde ne'e, enkontru ne'e foka mós ba dixiplina servisu, prevene konflitu intereses, salvaguarda dokumentu konfidensiál sira, no asegura jestaun ba relasaun serbisu ne'ebé saudavel entre pesoál funsionariu sira hotu inklui afirma prinsípiu neutralidade, integridade, no transparênsia iha prosesu lisensiamentu no regulamentasaun servisu telekomunikasaun ho padraun profisionál no tuir de'it Prosedimentu Legal sira ne'ebé mak vincula bá intereses Nasionál.