Díli, 14 Fevereiru 2025, Administrador Tékniku Konselhu Administrasaun Autoridade Nasional de Komunikasaun (ANC.IP), Sr. Novelino dos Santos, hala’o enseramentu ba Formasaun Ethical Hacking, ne’ebé foka ba prinsipiu esensiál sira iha Ethical Hacking, inklui konseitu fundamentál kona-ba seguransa informasaun. Formasaun ne’e hala’o ba profesionál tékniku informatika sira iha Salaun Correios, Kintal Ki’ik.
Iha okaziaun ida ne’e, Sr. Novelino dos Santos fó agradesimentu ba parte hotu ne’ebé partisipa, liu-liu ba: Instituisaun estadu, Sosiedade sivil, Akademiku sira
Sira hotu kontribui ho forma direta no indireta ba dezenvolvimentu kapasidade sibernétika iha Timor-Leste.
Ha'u hakarak fó agradesimentu espesiál ba formador sira ne’ebé fó kontribuisaun signifikativu, hanesan, Sra. Rizky Amelia Dumiyati, Sra. Lita Riyanti, Sr. Yan Maraden, Sr. Hamdan Abdul Aziz
"Ita-boot sira nia matenek no dedikasaun fó impaktu tebes ba ita-nia komprensaun kona-ba Ethical Hacking no seguransa sibernétika. Obrigadu barak ba partilha koñesimentu no esperiénsia sira hotu!"
ANC mos apresia kolaborasaun entre ANC ho JICA iha dezenvolvimentu rekursu umanu. Parseria ida ne’e fó plataforma importante tebes ba aprendizajen kontinua no dezenvolvimentu profesional iha área seguransa sibernétika.
Formasaun loron haat ne’e fó partisipante sira oportunidade atu aprende kona-ba; Prinsípiu Ethical Hacking, Identifikasaun ameasa seguransa sibernétika, Implementasaun kontrolu seguransa iha sistem informasaun, Metodolojia hacking & avaliasaun vulnerabilidade, Seguransa rede/web no protesaun sibernétika,Teste penetrasaun no mitigasaun hasoru risku.
Lisaun prátika ne’ebé hala’o konfirmá katak koñesimentu ne’ebé hetan iha formasaun ne’e la’ós de’it teóriku, maibé posivel aplika diretamente iha kontestu real.
Administrador Tékniku ANC, Sr. Novelino dos Santos, haklean:
"Seguransa sibernétika labele subestima! Hanesan reprezentante institusaun governu nian, sosiedade sivil no akademiku sira, ita-boot sira iha liña oin hodi hametin kuadru seguransa informasaun nian. Koñesimentu ne’ebé hetan iha workshop ne’e sei sai baze importante ba: Identifikasaun ameasa seguransa informasaun, implementasaun medida prevensaun sira, no haburas kultura konxiénsia seguransa sibernétika hodi halo vizilansia bá ita nia sistema."